«Ұлы дала мұрагерлері»

🔹️25 қазан күні Мәртөк ауданында Республика күніне және Ауыл шаруашылығы қызметкерлерінің күніне арналған «Ұлы дала мұрагерлері» атты салтанатты шара өтті. Бұл күн Қазақстан үшін тарихи маңызды оқиға болып табылады, себебі 1990 жылы еліміз тәуелсіздік пен егемендікке алғашқы қадамдарын жасады. Бүгінгі таңда Республика күні ұлттық мереке мәртебесін алып, халқымыздың бірлігі, күші мен тәуелсіздігінің нышаны болып отыр.

Мәртөк ауданының әкімі Медет Ысқақов аудан тұрғындарын мерекемен құттықтап, ауыл шаруашылығының аймақ экономикасындағы маңыздылығын атап өтті. Аудан басшысының айтуынша, ауыл шаруашылығы саласындағы еңбекқорлық пен табандылықтың арқасында ауданымыз тұрақты түрде дамып келеді. Биылғы жылы бірқатар маңызды жобалар іске асырылды: Первомай және Жаңажол ауылдарына газ жеткізіліп, Қызылжар, Байнассай және Хазірет ауылдық округтеріне газ тарту жұмыстары жалғасуда. Сонымен қатар, Кеңсахара ауылында жаңа мектептің құрылысы басталып, аудан орталығында өнер мектебінің құрылысы жүргізілуде, бұл балаларымызға сапалы білім алуға жаңа мүмкіндіктер ашады.

Одан бөлек, ауданның инфрақұрылымын жақсарту мақсатында жол жөндеу жұмыстары белсенді түрде жүргізілуде. Тұрғын үймен қамтамасыз ету мәселелері де оң шешімін табуда: жыл соңына дейін 140 пәтердің құрылысы аяқталады, оның 132-і аудан орталығында, ал 8-і Кеңсахара ауылында беріледі. Сондай-ақ, жыл соңына дейін Аққайың ауылында амбулатория және Қаратоғай ауылында спорт кешені пайдалануға беріледі.

Ауыл шаруашылығы ауданның басты саласы болып қала береді. Ауданда 484 шаруашылық жұмыс істейді, олардың бір бөлігі егіншілікпен, бір бөлігі мал шаруашылығымен айналысады. «Ауыл аманаты» жобасы аясында 334 жоба мақұлданып, 1,9 млрд теңге көлемінде несие берілді, бұл шағын бизнесті дамытуға және ауыл жағдайын жақсартуға ықпал етуде. Биылғы жылы дақылдардың өнімділігі жоғары болды, бұл шаруаларымыздың кәсібилігі мен қажырлы еңбегінің нәтижесі.

Аймақтың дамуына айрықша үлес қосқан аудан тұрғындары құрмет грамоталары мен медальдармен марапатталды. Мәртөк ауданы Мәдениет үйінің әртістері дайындаған концерттік бағдарлама мерекелік шараны қорытындылады.

Біз жетістіктерімізбен мақтанамыз және Мәртөк ауданының әрі қарай өркендей беретініне сенімдіміз. Баршаңызды Республика күнімен құттықтаймыз! Бірлігіміз бен еңбегіміз туған жеріміздің дамуына жол ашады!