Жастар жаппай қаланы тазартты

«Наурызнама» онкүндігінің соңғы күні — Тазару күні.

Бұл күні азаматтарға қоршаған ортаны қорғауды насихаттау, қоғамда экологиялық мәдениетті дамытуға шақыру мақсатында облыс территориясында жалпыұлттық экологиялық акция өткізілді.

Наурыз ертеден табиғат тазалығын сақтауды үндейді. Мерекенің мәні – көктемнен қысқа көшу, табиғаттың жаңа өмір бастауы.

Тазару күнінде ақтөбелік жастар «Қазақ халқына мың алғыс» стелласы мен Орталық саябақта тазалық жұмыстарын жүргізіп, ортақ мекеннің көркеюіне септіктерін тигізді.

Шараға атап айтқанда, облыстық және қалалық жастар ресурстық орталығының мамандары, облыстық «Жасыл ел» жастар еңбек жасағы, «Эко мәдениет» жастар қозғалысы, Ақтөбе студенттер Альянсы және Ақтөбе политехникалық колледжінен құралған 100-ге тарта жас қатысты.

«Мемлекет басшысының тапсырмасыменіске асырылған «Таза Қазақстан» акциясы мен «Тазару» күнінде Ақтөбе қаласының жастары, волонтерлері және «Жасыл ел» еңбек жасағы сарбаздарының қатысуымен сенбілік жұмыстары өткізіліп жатыр. Осы орайда, Ақтөбе қаласының тұрғындарын, жастарын өзіміздің тынығатын жерімізді, демалатын саябақтарымызды таза ұстауға шақырамыз», — дейді «Жасыл ел» ұйымы төрағасының орынбасары Артур Әзиев.

Сонымен қатар, Тазару күнінде аудан жастары да тазалық жұмыстарын жүргізуде.Облыстағы барлық 12 ауданда жастар, табиғат жанашырлары саябақтарды, арықтарды, көшелерді қоқыстан тазартты. Кейбір аудандарда қоқыс-қалдықтарды көп жинаудан эстафеталар ұйымдастырылды.

Ақтөбенің тазалығы — ортақ абырой. Осындай тазалық жұмыстарын жүргізу белсенді жастардың назарынан тыс қалған емес.  Былтырдан бері өңір жастары «Таза Қазақстан» республикалық экологиялық акциясына елеулі үлес қосуда. 

Барша ақтөбелікті қоршаған ортаны таза ұстауға шақырамыз.