«AMANAT» партиясы Мәртөк аудандық филиалы аудан әкімдігімен бірлесіп «Ауыл аманаты» жобасының аудан көлемінде жүзеге асуы барысын талқылау мақсатында кеңес өткізді.
Аудан әкімі Медет Ысқақовтың төрағалығымен өткен отырысқа Қазақстан Республикасы Үкіметі және «AMANAT» партиясының Өңірлік даму Жобалық кеңсенің Ақтөбе облыстық үйлестірушісі Жанар Балғабаева, «Ақтөбе» әлеуметтік кәсіпкерлік корпорациясының өкілі Асланбек Алданғаров, «AMANAT» партиясы Мәртөк аудандық филиалының атқарушы хатшысы Ануар Искарин және округтің әкімдері қатысты.
Отырыс барысында 2023 жылдан бері «Ауыл аманаты» жобасы бойынша несие алған аудан тұрғындарының бүгінгі жағдайлары талқыланды. Жалпы Мәртөк ауданы бойынша 306 жоба бар. Оның бүгінге 55-і тоқтап тұр. Соның ішінде 28 адам несеиесін төлей алмай отыр. Мұның жайы округ әкімдерінен сұралды. Өкінішке орай, кейбір әкімдер бейхабар болып шықты. Аудан басшысы олардың бұл бағыттағы жұмыстарын сынға алды. Сонымен қатар, олардың кәсібінің ілгері жүруіне әкімдер тікелей ықпал етулері қажет деп тапсырма берді.
Қазақстан Республикасы Үкіметі және «AMANAT» партиясының Өңірлік даму Жобалық кеңсенің Ақтөбе облыстық үйлестірушісі Жанар Балғабаева «Ауыл аманаты» жобасы аясында тағы да несие берілетіндігін және оны алудың жаңа тәртібін түсіндірді.
«AMANAT» партиясы Мәртөк аудандық филиалының атқарушы хатшысы Ануар Искарин «Ақтөбе» әлеуметтік кәсіпкерлік корпорациясына бұған дейін несие алып, шаруаларын жүргізе алмай отырған азаматтардың әлеуметтік жағдайларын ескере отырып, несиесін қайтаруда жеңілдіктер қарастыруларға ұсыныс білдірді.
