МӘРТӨК АУДАНЫНДА ОБЛЫСТЫҚ ЖАСТАР ФОРУМЫ ӨТТІ
МӘРТӨК АУДАНЫНДА ОБЛЫСТЫҚ ЖАСТАР ФОРУМЫ ӨТТІ
2025 жылдың 29 қаңтарында Мәртөк аудандық мәдениет үйінде Мәртөк ауданының 90 жылдығы мен «Жұмысшы мамандықтар жылына» орай «Мәртөк Жастары: Өзгеріс, Өрлеу, Өсу» атты облыстық жастар форумы өтті. Форумның негізгі мақсаты облыс жастарының әлеуметтік, экономикалық және мәдени дамуына ықпал ету, олардың белсенділігін арттыру, көшбасшылық қабілеттерін дамыту болды. Сонымен қатар, жастар ресурстық орталықтарының мамандарының кәсіби дағдыларын арттырып, өзекті мәселелерді талқылау да назарға алынды.
Форум Мәртөк аудандық мәдениет үйінде басталып, аудандық ішкі саясат және тілдерді дамыту бөлімінің басшысы Д.С. Тлеуовтың құттықтау сөзімен ашылды. Қатысушылар мен қонақтарды марапаттау салтанаты өткізілді. Мәртөк ауданының 90 жылдығына арналған сахналық қойылым көрермендерге ерекше әсер қалдырды. Сонымен қатар, Байғанин Жастар ресурстық орталығының басшысы Шыңбай Мейірболат Айдосұлы мен Темір Жастар ресурстық орталығының басшысы Сәлімгерей Асан Саматұлы TEDx форматында семинар-тренинг өткізді.
Форумның екінші бөлімі Қазан ауылында өтетін тимбилдинг ойындарымен жалғасты. Бұл бөлімде қатысушылар командалық жұмысты жақсартуға бағытталған түрлі ойындар мен тапсырмалар орындап, өзара ынтымақтастықты нығайтты.
Шараның қорытынды бөлімінде форум интеллектуалды Quiz ойынымен аяқталды. Бұл бөлім жастардың білім деңгейін арттыруға, ойлау қабілеттерін дамытуға бағытталды.
Форумға аудан мектептерінің мұғалімдері мен облысымыздың басқа өңірлерінен келген қонақтар қатысты. Мәртөк ауданының жастары да белсенді түрде қатысып, өздерінің идеяларымен бөлісті. Форум жастарды бір арнаға жинап, олардың әлеуетін дамытуға ықпал етті, сондай-ақ жастардың өзекті мәселелері бойынша тиімді шешімдер іздеу жолдарын қарастырды.
Қорыта айтқанда, бұл шара облыс жастарының ынтымақтастығын нығайтуға және олардың белсенділігі мен көшбасшылық қабілеттерін арттыруға бағытталған маңызды қадам болды.
